بناء على ما سبق وكتبته فى المقالتين السابقتين حول مونودراما «أحلام مصرية جدًا»، أتمنى مستقبلًا من الباحثين أن يبحثوا فى أمر هذا الموضوع من خلال عدة جوانب، منها: توثيق وتأريخ فعاليات مهرجان بور سعيد المسرحى عام 1986، ومعرفة كل تفاصيل مسابقة المونودراما، وهل نصوصها موجودة، كونها من أوائل النصوص المنودرامية فى هذا الوقت المبكر. كذلك معرفة تفاصيل عرض «أحلام مصرية جدًا» فى السويد، واسم ممثلها، والأهم من كل هذا اسم كاتبها الحقيقى، وهل هو المرحوم فؤاد صالح مدير المهرجان، كما يظن السيناريست صلاح متولى، أم المخرج رؤوف رزق – المقيم فى كندا الآن - وهذا ما أظنه، أم الممثل وهذا احتمال وارد أيضًا! وبناء على ما سبق لم يبق لنا فى هذا الموضوع إلا إثبات نص «أحلام مصرية جدًا» كونه وثيقة مهمة لنص يبحث عن مؤلفه!«سرحان»: ستة وتعالى/ الجوكر معاهم/ أكشف (يصحون من النوم بعد أن ينقلب من فراشه للأرض) شفت منام واحترت أنا فيه/ دلوقت حاحكيلكم عليه... خير اللهم أجعله خير/ لا موش خير كل حاجة بقت ملخبطة حتى الحلم الواحد طول النهار صاحى ويحلم ويجى ينام عشان يريح دماغه برضه يحلم/ ووصلت معايا لرئيس جمهورية/ أنا سرحان المصرى رئيس الجمهورية الاشتراكية الرأسمالية الإمبريالية.. ياه يا سرحان رئيس على طول كده من غير ما تفوت ع الكلية.. والله كانت متغطية ببطانية صوف المحلة وارد هونج كونج بس أنا موش عايز أبقى رئيس أنا عايز أسافر بره/ توبس أورتوت/ أكون أو لا أكون/ لا ما عدتش الحكاية كده.. فليسقط شكسبير ولتنتهى كل الموروثات/ أنا شكسبير مصر 1875 سنة سنة حنكمل نُص ديني/ حاجوز وألا حاموت تلك هى المسألة/ فلينته الشعر فلتسقط كل موازين ترفع من قدر الإنسان أو بمعنى أصح فلتنتهى الثقافة الرفيعة التى لا تجد تطبيقًا علميًا لأنها مازالت تقول أكون أو لا أكون تلك هى المسألة. لا يا مثقفين حاتجوز إلا حفضل على لحم بطنى تلك هى المسألة/ حلاقى شغلانة تكفى مصاريفى وإلا حافضل صايع تلك هى المسألة حاعرف أسافر بره وأكون نفسى تلك هى المسألة.. أنا ما عنتش فاهم حاجة/ حد فيكم فاهم حاجة فى أى حاجة.. طب ليه أصلًا يبقى اللى فاهم فاهم وموش فاهم.. فهمتوا حاجة.. أنا معايا واد أحير مات أنا ماسك مسكه حديد بس لما يبقى الجوكر حتخلص/ نفسى أخلص من روحي/ نفسى أموت بس لا.. أحلى حاجة عملها أبويا أنه جاب فى البيت ده جوزة أصله قهوجى وصاحب مزاج يبقى يومك يوم مهبب لو صادفته وشفته مرة قبل ما يشد المزاج.. يا ساتر وشه أسود وصوته كحة.. ولكن تعالى وشوف لما يكون مبسوط شوية هى هى نفس الحكاية.. أيوه يابة أنا قلبى معاك/ بس اللى نفسى أفهمه إزاى بتتخن/ ده أنته كل اللى بتاكله فول وأى حاجة مسعرة تحت الجنيه/ وأنا يا بنى فى نص سنك كنت يا دوب مجوز أمك بخمسين جنيه ولا أكتر شوية موش فاكر/ أنته صعبان عليا وربنا أنته صعبان عليا/ قوم يا بنى نام.. مطرح ما يجى فى عينى النوم أنام وأنا مرتاح البال.. نام يا خويا نام ياما نمت/ قولى بس عملنا إيه/ يا سلام يا سرحان بس لو ما كانش الفلات فول كنت دخلت الحربية وزمانك وصلت على الأقل وزير ولا رئيس مصلحة.. طب حتعمل إيه؟ أفرض وصلت حتعمل إيه؟ آه أنت دلوقت تعبان ولازم لما تحكم تريح الناس اللى تعبانين اللى زيك/ يعنى كل واحد يلاقى شغلة يلاقى شقة ست يلاقى حتة/ طب والله ممكن بلدنا تبقى جنة.. يا سرحان أنت حتغير نظام الكون ما تسيب الملك للمالك.. وبعدين الناس بيحلموا بالجنة فوق وعمرهم ما بيفكروا يجيبوها تحت.. المشكلة دلوقتى أنا حاعمل إيه بنفس موش حكون مخلوق كده من غير مناسبة/ لازم أعمل أى حاجة لازم أحس أنى عايش/ طب أى حد يعمل بيّه أى حاجة.أريد زوجة/ المواصفات.. مصرى كريم العنصرين/ الوزن من غير ورق 90 كيلو/ رجل مكتمل الرجولة على ما أظن خلصت جيش/ الوظيفة بكره تفرج/ ممكن أسافر بره/ أستراليا طالبة ناس وكندا برضه/ وفى حاجة جديدة اسمه برونا/ بروني/ الشقة مفيش/ دخل ثابت/ برضه مفيش/ واللى عاجبها على كده أهلًا وسهلًا/ واللى موش عاجبها بالسلامة/ الكرامة فوق كل شيء/ وأنتوا بتشتروا راجل/ اشتروني/ والنبى حد يشتريني/ طب أعمل إيه/ ما أنتوا برضه عارفين الحكاية واللى بيجرى/ أتولدت ما عرفش حاجة/ لعبت عسكر وحرامية/ وبيوت ونطة الإنجليز ولعب كرة حافى فى الشارع/ خدت حمى وبلهارسيا وإسكارس/ وعندى نازلة شعبية مزمنة وبعدين دخلت المدرسة/ محمد يشرب اللبن/ مصر أم الدنيا كلها/ الاشتراكية والإصلاح الزراعي/ وبعدين محمد برضه يشرب اللبن المستورد/ تو بى أر نوت تو بي/ شعر جاهلى.. أَمِن أُمِّ أَوفى دِمنَةٌ لَم تَكَلَّمِ .. بِحَومانَةِ الدُرّاجِ فَالمُتَثَلَّمِ/ وبعدين خدنا الشهادة وزغردت أمى وأبويا عزم أصحابه/ وراح هبشنى من قفايا/ أظن كفاية عليا كده أسبقنى ع الكشك يابا ممكن أدخل الكلية/ ولا كلية ولا دياولو.شاى وحجرين يا سرحان/ حاضر/ شاى على ميّه بيضة/ حاضر/ قهوة سادة ومنيلة بنيلة/ حاضر/ عشرين رغيف وبخمسة صاغ طعمية وكومة ملح وشطة عشان إحنا كتير/ حضر/ وبعدين.. دخلت الجهادية/ يالا يا عسكرى يا نمرة منك له/ الجيش تهريج منظم/ أقف عدل يا عسكرى أنا شايف صباع رجلك الصغير بيتحرك جوه البيادة/ أنا ممكن أسحرك وأمسح بكرامتك الأرض ومتعرفش تاخد حق ولا باطل.كنت أول مرة أعرف الدوسنتاريا وكسر النفس.. فكرك يا واد يا سرحان حكاية أريد زوجة دى حتاكل معاك/ طب دأنا محطيتش شروطي/ هي/ قصدى شيء بالإنجليزى عشان يعرفوا أن أحنا مثقفين/ امرأة مطلقة عازبة أرملة رقاصة هجاصة أى حاجة/ عاقر يعنى ما بتخلفش/ عشان لو جبنا عيال حنسرحهم يشحتوا بإذنالله/ يتيمة الأبوين والأخين والأختين/ سمينة.. فرسة تملا العين/ لأ بلاش سمينة يا سرحان حتاكل كتير وحتخرب بيتك.. أنا عايزها نحيفة عصاية/ ويستحسن يكون عود قصب/ نتاية معصعصة/ وعلى رأى بيرم أنا عايزها نتاية بصحيح من ربع شمعة تسيح.. موش تخينة بكرش من الحمار ماتغيرش/ تقدس الحياة الفقرية/ تشارك فى البحث عن عشة نتلم فيها/ مستعدة للسفر للخارج/ بس كده.بقى حلم مقرف/ عمال أحلم أنى حتجوز وحيبقى لى بيت وعيال لكن إزاي/ حد يفهمنى إزاي/ أنا راجل/ والراجل عايز ست/ والست فى بيت أبوها/ وأبوها طالب ألوفات/ والتعلب فات فات وفى ديله سبع لفات/ قصدى سبع طلبات/ الطلب الأول يعنى الوظيفة/ الوظيفة زى ما أنت عارف/ وموت يا حمار لما تلاقى جنبك حمارة/ والحمارة عايزة أسطبل/ والأسطبل صبح تمليك/ والتمليك فى إيدين التاجر/ والتاجر طول عمره فاجر/ والتعلب فات فات وفى ديله سبع لفات.واللى فات عمره ما بيموت/ كل عام ومواسم عدوه/ وشجر الليمون دبلان على أرضه/ إحنا شجر الليمون اللى عمره ما دبل/ دبلنا على أرضنا/ بينك وبينى أحزان/ ويعدوا/.. شجر الليمون دبلان (أغنية) أنا حمار عايز حمارة/ والحمارة عايزة شطارة/ والشطارة فى التجارة/ والجواز أصبح مجنون/ مدفوع التمن/ والتمن مجنون/وشجر اللمون دبل/ يعنى ممكن يا محترم تبنى عشة صفيح/ أسطبل يعني/ أنا المصرى كريم العنصرين.. لا أنا موش حمار/ صحيح الحمار شعار حزب أمريكا الديمقراطى الليبرالي/ ليبرالى يعنى إيه؟/ يعنى ليبرو/ آه لعيب ليبرو/ آه لو ما كنتش تخينة شوية/ كان زمانك مسحت العالم بتوع الكورة/ وكان زمان النادى المصرى مضالك عقد وهاصت معاك/ والناس تتكلم عنك/ ويقطعوا فروتك فى كل حتة/ وصورك بالألوان فى كل مكان/ ويدلعوك يقولوا لك سيحو/ سيحو جاله صداع سافر لندن/ سيحو جاله إمساك سافر باريس/ سيحو جاله إسهال سافر ألمانيا/ سيحو قرصته برغوته سافر الصعيد/ واسمك بيجى فى الكلمات المتقاطعة/ والموظفين تقعد تشد فى شعرها/ اسم مكون من أربع حروف/ والصحافة تكتب عنك بالبنط العريض/ السح الدح إمبز/ المصرى سيحوه/ إديله محلول يا عفاف/ (يتخيل شكل تليفزيون يتحدث من خلال) لحظة من فضلك/ أعزائى الشباب يا حماة الوطن/ يا مستقبل الوطن/ إزى الصحة يا حلوين/ يا ترى بتشربوا اللبن والميّه المعدنية قبل ما تناموا/ وبتغسلوا أسنانكم بمعجون إيه؟/ أى أى اللثة بتنزف عليا/ عشان ما تمدغش لبان على بابا/ استعملوا حبوب طبقة البلاك فول/ أو جرب أيس كريم أحمر وأخضر وأزرق/ قاصد كريم للموبليا قاصد خراب بيوتكم/ ودلوقتى نرجع لموضوعنا/ الشباب/ طبعًا الإعلانات اللى شفتوها وحتشوفوها على طول دى للناس الكويسة/ أى حد يحس أنه موش كويس/ يقوم من قدام التليفزيون/ والناس بتقول إن الإعلانات دى استفزازية/ والناس بتعصر نفسها لما تشوف بتوع الشراشيب والعقد وعزبة كيمو وإعلانات الشقق والعطور والبنوك والحاجات اللى تفتح النفس/ ده حقد/ طب أنتوا ما معاكوش فلوس/ طب إحنا مالنا/ عايزين إيه؟ نقدم لكم إعلانات على الفول؟.. وأنا بالمناسبة المسئول الكبير الدكتور شموطح الشمام/ إيه رأيك يا دكتور/ فى الحقيقة والواقع شبابنا ده موش زى شباب زمان/ فين زمان وشنبات زمان/ الشباب الأيام دى داير على حل شعره بيشرب حشيش ويشم كوكو/ الحكومة حتعمل إيه/ الشباب أصبح له أطماع غريبة/ لازم الشباب يكافح ويوصل/ زى ما إحنا كافحنا ووصلنا/ إعلان/ شربة دجاج ماجى إلذ ألذ/ طب يا دكتور البنات كده حتعنس/ عليهم بالصبر والصلاة/ دلعناكم كتير/ الهزار خلص ما عدش إلا الجد/ إعلان/ لطعكو على قفاكم أنترناشيونال تعلن عن تشطيب أبراجها الفاخرة سوبر لوكس مقدم شراء 100 ألف جنيه/ يا بلاش/ والآن مع برامج الأسبوع/ السبت فيلم أمريكانى ومسلسل أمريكاني/ الأحد السهرة فرنساوى إخراج فرنساوى والاثنين برضه أمريكاني/ التلات الراجل الأمريكانى الفزدقي/ الأربعاء فيلم رعاة البقر/ الخميس السهرة مع الفيلم (الصباع القاتل) أفلام حسن الحاوى تقدم.. يشاء القدر البيان اتولد بست صوابع/ فى ليلة عاصفة ناسف الشيطان اللعين أغرى أمى الساذجة لارتكاب الخطيئة مع أبويا الساذج ابن الباشا ةكنت أنا بست صوابع مشوه.. أمى قرفت من منظرى سابتنى جنب الحيطة كبرت/ معرفش إزاى هربت من الملجأ/ كان لازم أتحول لمجرم وحش متعرفش الراحة طريق لقلبه/ كان لازم أنتقم من المجتمع/ أشتريت مطوة قرن غزال بسوستة وصاحبت العيال المجرمين وبقيت أشرب جوزة وحشيش/ الحشيش كان مضروب/ وأتفرج على صور عريانة/ وفى لحظة مشئومة فى ليلة عاصفة مشئومة وجدت امرأة تهرول بمفردها فى منتصف الليل اغتصبتها وبعدين دبحتها/ لكن قبل ما تموت شافت الصباح السادس قالت لى وهى تلفظ أنفاسها وحيد يا بنى أنا أمك/ صعقت وجريت/ ليّة لوحدى فى مجتمع ظالم/ لا يرحم ليه.. (صوت آذان) الله أكبر.. حكمتك يارب (انتهاء الفيلم) إيه رأيك يا دكتور فى الفيلم؟/ عظيم/ جميل/ فى الواقع والحقيقة جميل/ خصوصًا إن المجرم فى النهاية عرف ربنا وتاب/ لازم الشباب بتاعنا ياخد عبرة/ الشباب انحرف/ لازم يستعينوا بالإيمان فى طريقهم الطويل الطويل/ أنا برضه بستة صوابع لكن حاربت/ اتحديت المجتمع لحد ما وصلت/ وتعبت لحد ما بقيت فى مركزى الكبير/ بالإصرار والعزيمة فتح عينك تاكل ملبن/ فتح مخك تولع معاك/ فى نهاية البرنامج بنشكر الدكتور شمرطح الشمام ونقول لكم تصبحوا على خير وأحلام هنيئة...أحلام تانى.. لا.. لا.. أنا موش عايز أحلم تانى.. لا.. لا.. لازم نتصرف/ لازم نعمل حاجة.. لازم نتحرك بدل ما نحلم تانى وتانى (يتثاءب) والأحسن أرجع للنوم.. تانى «نهاية».